МИРИШКОР. "Қашқадарё вилояти Миришкор туманидан ёзмоқдамиз. Асли Наманганданмиз. "Big Agro" фирмаcи билан апрель ойида келишиб, қалампир етиштириш учун Миришкор туманига оиламиз билан кўчиб келдик. Ҳар бир гектар учун 900 минг сўмдан берадиган бўлишди. Қишлоқнинг ўзида ҳар бир хўжалик 4 миллион сўмдан аванс олди. Биз боргандан кейин оламиз, деб олмадик.
Келибоқ эркагу аёл ишга киришиб кетдик. Аммо фирманинг ўзи кўчатни вақтида тайёрлаб беролмади. Апрель ойида келишилган суммадаги маошни сўрасак, "Нима ишни қойиллатдиларингки, маош сўрайсизлар", дейишди. Бошқа хўжаликлар тўрт миллион сўм аванс олган бўлса, биз атиги икки миллион сўм маош билан чекландик. "Апрелда ойлик йўқ, хоҳласанг қол, хоҳламасанг кет", деди "Big Agro" мутасаддилари худди қулга муомала қилгандек. Кўпчилик тушкунликка тушиб, деҳқончилик учун ер ахтарди. Топгани топди, топмагани қуруқ қўл билан, қўйнидаги пуч ёнғоғини орқалаб, бола-чақасини олиб водийга қайтиб кетди. Бизнинг қайтишга пулимиз йўқ эди, алиментдан қарзимизни узиш учун уйга юборгандик. Аввал ҳар бир гектар ер учун 900 минг сўмга келишилган бўлса, энди 600 минг сўмга туширишди. Қуруқ қўл билан қайтмайлик, деб иложсизликдан қолдик. 13 гектар еримизга кўчат экдик. Майнинг маошини жанжал-тўполонлар билан бир миллион икки юз ўн минг сўм ками билан олдик. Бу иссиқ жойларда боламизни соғиниб ўтиришнинг ўзи азоб! Бунинг устига, тирикчилик деб келсагу, булар бизни ишлатиб, қилган меҳнатимизга вақтида ҳақ бермаса! Яна хорижда эмас, ўз юртимизда-я! Иш оғирлигидан касал бўлиб қолдик. Офтобда ишламанглар, дейди шифокор.
Бошимиз қотиб ўтирибмиз, кетайлик десак, тирикчилик қилиш керак. Ҳамма ғамга ботган. Бошидан шунча алдаса, охирига келиб бир тийинсиз қолиб кетмасмиканмиз?! Аванс пулидан икки миллион, ўтган ой маошидан бир миллион икки юз ўн минг кам олдик. Энди ойлик бериш тўхтади, яна тирноқдан ичидан кир қидиришяпти. Ҳолбуки, ишни виждонан қиляпмиз. Қалампирларимиз баравж ўсаяпти. Бизнинг поймол этилаётган ҳақ-ҳуқуқимизни ким ҳимоя қилади?"
SizdanTelegram рукни шикоят юзасидан тилга олинган "Big Agro" маъмурларининг изоҳини ҳам ёритишга тайёр.
Ўзбекистон ва халқаро ҳаётга оид энг сўнгги янгиликлар, қизиқарли фото-видео тасвирларни Озодликнинг Instagram саҳифасида кузатинг!
******************************************************************************
Резюме"Sizdan Telegram" лойиҳасида Сиздан келаётган хабарлар, фото ва видеолар ўрин олади. Telegram, WhatsApp тармоғидаги рақамларимиз: +420 724 971 539; +420 724 740 755. Электрон почтамиз: ozodlikmail@gmail.com 60 йилдан зиёд вақт мобайнида холис журналистика андазалари асосида фаолият юритаётган Озодлик радиоси, агар истасангиз, шахсингиз сир қолишини кафолатлайди. ****************************************************************************** Илтимос, "Sizdan Telegram" лойиҳасига юбораётган хабарингизга, имкони бўлса, фото, видео ёки бошқа ҳужжатларни илова қилинг! |